Dêr steane se, omdat se net mear witte
út wat hoeke it noch waait,
mar wat soe dat, se hâlde har net stil,
wat alles fan ’t karakter seit,
sy litte oaren foar har switte,
dizze captains of industry.

Hjoed steane se, ’t is troch de wike sitte,
want derûnder moat de wyn
by folk dat skuort oan seil en fok, har wil
is wet, sa komt de winst deryn,
sy kinne ’t managen net litte,
dizze captains of industry.

De weagen jouwe har hjoed del, sy sitte
dêr net mei, mar stean foar peal
by ’t folk dat moandei foar har skreppe sil,
de skoaten oan, it kin net heal:
it rendemint is goed te mjitten
troch de captains of industry.

Sjoch him op it helmhout sitten,
dat sels stiif sit tusken hannen yn,
takomstich skipper Anne Jan
mei Nijhuis as syn fan;
it nije skûtsje leit goed oan de wyn,
dat sil hiel Starum witte!

Lit Súdwest it âlde sjitte,
’t alderlytste fan de float,
as alderearste kampioen?
It antwurd is al jûn:
sa’n misdied hat in protte fan in moard,
dus Starum kin ’t ferjitte!

Anne Jan kin ek noch kieze
tusken âld en nij, wat er mar wol,
ambysje of foar aardichheid,
mar as it aardich waait,
dan hat er beide hannen mear as fol,
dochs nea sil hy ferlieze!