Kinne aaien oars wat sizze
as herhelling is it merk,
fan foarm ovaal, de kleur egaal,
de dop net al te sterk
en ek dat hinnen harren lizze?

Floris kin it neifertelle,
trije kear itselde byld,
fiif kear ovaal, de kleur egaal;
omdat it him besielt,
hat hy de keunst herhelle.

Libbenskeunst is de herhelling
fan wat is de minske nei,
ovaal of rûn, dat is egaal,
hy leit it eigen aai
en kleuret syn fertelling.

* Floris Verster (1861-1927)
skildere de nap mei aaien
trije kear, yn 1906, 1914 en 1915.