Willem Tjerkstra’s thússide

Posted by admin

admin

De Lemmer heint wyn

Skûtsjesilen 2022

As se draaie, stiet der wyn,
dy’t se mei de wjukken heine
foar it leverjen fan enerzjy
ta nut fan hiel it easkjend folk…
wat hâldt dy eask úteinlik yn?

Skippers ha ferlet fan wyn,
dy’t se mei har tugen heine
om de skûtsjes enerzjy te jaan,
mar easkje hat gjin inkeld nut,
wol hâlde sy de siken yn…

… as in koeltsje yn de fok
falt, de skoat begjint te lûken,
wat it seil de krekte spanning jout
om op te loevjen nei de boei,
sa’n koeltsje biedt de skipper lok.

Lit De Lemmer dat hjoed ha,
mar de skipper fan dat skûtsje
heint de twirren op de eigen mar
ek op, lykas in mole op
it lân, hy giet op ’t winnen ta.

* Foto ‘Wynmoles by De Lemmer’
** Foto ‘Striid tusken De Lemmer en Grou’

admin

Trije L’s foaroan

Skûtsjesilen 2022

It wie de striid fan trije L’s:
De Lemmer, Ljouwert en Langwar,
De Lemmer op it eigen wetter
fan de Iselmar.

Foar Ljouwert jildt dit wetter ek
as eigen, want de stêd mist mar
en poel en keas foar ’t romme wetter
fan de Iselmar.

De Lemmer foer foar syn publyk
in wedstriid dy’t der wêze mocht,
mar foar in kampioen koe ’t better,
wat er moarn grif docht.

Foar Ljouwert en De Lemmer wie
gjin heechste ear, wol foar Langwar,
it koe net better op it wetter
fan de Iselmar.

* Foto ‘De trije L’s’
** Foto ‘De swan fan Langwar’

Archieven

Zoeken

  • Categorie

  • Datum