april 26, 2024
fan ûnbekend*
Wolkom, freugde fan de wrâld,
haadljocht oer de stjerren**,
net allinnich yn it Fryske gea,
mar ek op see by Lanikai
tusken Moku Nui en Moku Iki
riisto op, bringst waarmte mei.
Twilling, rotsen, tige âld,
mar noch net op stjerren
nei al dea, bliuw wachters foar it strân
fan ’t ivich libjend Lanikai,
rop de sinne dei nei dei it wolkom
ta, hy bringt de freugde mei.
Fûgels fan it wiete sâlt,
skodzje op jim fearren
yn de moarntiid op ’e keale rots
en flean dan earst nei Lanikai,
sjoch de sinne tusken beide wachters
rizen: ‘Wolkom dizze dei!’
* Foto ‘Moku Nui en Moku Iki, Hawaii’
** Sitaat fan Gysbert Japicx
april 25, 2024
fan Marten Groenhof*
Hoe faak ha ik dit byld al sjoen
fan ’t skip ôf, altyd ûnderweis
mei yn it rom de modder
foar boeren op it earme fean,
ik wie doe seis.
Ik seach de toer fan ’t Heidenskip
krekt boppe lege huzen út,
mar net de grutte skoalle,
dêr soe ’k meikoarten hinne gean,
net myn beslút.
Myn âlders seagen ’t as har plicht
om my it bêste mei te jaan,
ik moast fansels ek leare
om op te bouwen myn bestean…
koe ik soks dwaan?
Ik woe dit út ’e fierte sjen:
It Heidenskip fan ’t wetter ôf,
it tuorke boppe huzen,
net tichter by, nei skoalle gean,
sa’n grut gebou.
* Marten Groenhof (1925-1978)
Skilderij ‘Sicht op Hofmar en Brânbuorren’