december 2, 2022
fan ûnbekend*
fan ûnbekend**
Malawimar, gigantysk grut,
in mar fol mei cichliden,
de iene is de oare net,
se binne der yn soarten,
bûn oan Darwins evolúsjewet.
De fisken kroepen út ’e mar
it lân op, krigen wjukken
en fleagen oer it griene gea,
se wiene der yn soarten,
letter rûnen bisten mei de lea.
Malawimar, gigantysk grut,
in mar mei rûnom bisten,
it âlde paradys allyk
mei withoefolle soarten…
neffens evolúsje Darwins ryk.
* Foto ‘Malawimar’
** Foto ‘Cichlide’
november 25, 2022
fan ûnbekend*
fan ûnbekend**
As God socht hy de djipte op
mei boppe him de weagen,
dy’t er fier opswypkje koe
as skipslju him net noasken,
fier klonk oer de see syn rop.
Hy dûkte foar de timpel op
dy’t boud wie op ’e hichte
fan Kaap Soenion, dêr koe
hy útsjen beide kanten
op, ek dêr klonk fier syn rop.
Dêr socht it eigen folk him op,
de skipslju en dy fan it
lân, om’t elkenien him koe
as god dy’t wist fan wanten,
fier klonk yn it lân syn rop.
Hy spriek oer eigen djipte op
en liet syn hichte witte,
om’t er oeral hearskje koe
mei ’t ark mei trije tosken,
seelju harken nei syn rop.
* Byld ‘Poseidon’
** Timpel fan Poseidon by Kaap Soenion’
