januari 31, 2018
Ut it skûtsje-argyf 2011
Wol harkje nei in krisistiid
yn ’t sylfermidden, jierrenlang,
dy’t tasloech yn Langwar,
dat folkje stribbe nei de earste rang,
mar rekke út ‘e striid.
In sterk ferhaal fleach wiid en siid:
it iene nei it oare skip
fart foar in lyts Langwar,
al wer in nije skipper, wol ferhip,
de âlde út ‘e striid.
De krisis makke lykwols bliid
doe’t einlings kaam de gouden tip:
de klimaks foar Langwar
wie alris kampioen, it is it skip
dat hjit fan ‘Ut ‘e striid’.
’t Gefoel gie nei de âlde tiid
doe’t Ulbe* hearske as in foarst…
kaam hy net út Langwar?
Dat bingo! Pakesizzer Ulbe** moast
no komme yn de striid.
Mar krisis wie it wiid en siid,
’t idee wie doe in sponsorclub,
in bank foar ’t skip Langwar,
it grutte kapitaal sloech ta en hup,
dêr sylde ‘Ut ‘e striid’.
Dochs wie de skipper** lang net bliid
mei ’t djoere goud op ’t achterdek
dat heine moast Langwar,
hy sylde yn de krisis net foar gek
en rekke út ‘e striid.
* Ulbe Zwaga
** Ulbe Brandsma
januari 27, 2018
Ut it skûtsje-argyf 2011
It soe wer wêze of dochs net,
nei dagen fan in heale stoarm
gie ’t rap de lege midden yn,
mar foar it waar klonk wer alarm:
in loft fol wolken, mar gjin wyn.
De wolkeloft dreau oer de mar
yn banen heech en leech mei wyn
dy’t striek de fjirtjin yn it seil,
in rige mei de gong deryn,
it waaralarm wie ûnder peil.
De rige sylde nei in kloft,
elk woe wol earst it krúsrek yn,
mar ien foer nei it bêste plak
en kniep it skûtsje oan de wyn,
de oaren leine lilk foar blak.
Wol blaksum, wa kaam om de boei
as earste fan de lêste seis,
’t wie Huzum, sprinter oan de ein
fan fjirtjin dagen ûnderweis,
mar dêrmei wie net alles sein.
Want sprintsje koe ek ’t Hearrenfean,
dat kniep en skraal de boei oanrûn
en sa de lêste wedstriid wûn;
it giel-swart hat de trochslach jûn:
de Pan waard klappend kampioen.