oktober 13, 2024
fan ûnbekend*
Kinne rjochters alle leed
weinimme fan wat yn in oarloch
bart? Dêr is net rjochtstreeks sprake fan,
de skiednis hâldt it ûnrjocht beet.
Neurenberg hat wol besocht
de nimmers fan miljoenen libbens
mei it leed te konfrontearjen, mar
ha rjochters dit yn lykwicht brocht…
… mei de straf de dieders jûn?
De deastraf kompensearret net de
deaden dy’t weiwaarden yn it fjoer
nei’t gas de wei nei binnen fûn.
Neurenberg spriek tolve kear
de deastraf út, it koe net minder
foar de deaden en foar wa’t it noch
fertelle koene… nea wie ’t klear.
Sprake bliuwt fan ûnrjocht dat
gjin rjochter mei syn sprekken lykstrykt,
net yn Neurenberg noch Kiev noch
De Haach, sa is it wrâldske lot.
* Foto ‘Ynternasjonaal Militêr Tribunaal
yn Neurenberg’
oktober 6, 2024
fan ûnbekend*
fan ûnbekend**
De woestyn sil bloeie as in roas
wannear’t in wolk syn drippen falle lit,
want út it sied ûntstiet de plant
dy’t fiedt de minske en it dier…
somtiden lykwols bart wat oars.
Lit woestyn Alamagordo sjen
oan ’t minskdom hoe’t in hege wolk ferriist
dy’t liket op in poddestoel,
de drippen komme deadzjend del,
it libben giet foargoed ferlern.
Wittenskippers kamen ta de kearn
fan wat dit wapen wol betsjutte kin
as driging en yn werklikheid,
Alamagordo seach ’t begjin,
lit stean om nei de ein te gean.
De woestyn sil bloeie as in roas
as ’t minskdom syn beskaving reine lit
de grins oer foar de fredesplant.
* Foto ‘Poddestoelwolk’
** Foto ‘Wolk’
