mei 21, 2023
fan ûnbekend*
Wa wist as fikser fan de coelacant?
Net Hendrik Goosen, trawlerkapitein,
dy’t fiske foar de Afrikaanske kust;
hy fong, as wie ’t in oaljefant,
in meunster fan sawat twa meter.
In wittenskipper hie ’t oer in fossyl,
want nea hie men dy fisk yn libben sjoen,
dus wittenskiplik wie dy fangst in lust,
ferlykber mei ’t bestean fan iel,
dy waarden lykwols gjin twa meter.
De coelacant wie foar de wittenskip
in fisk fan grut belang en ek fan striid:
de Frânsen woene ha, ’t wie harren kust
dêr’t coelacanten swommen djip,
se dûkten nei sânhûndert meter.
Faak dûkt de wittenskip ’t ferline yn
en komt wer boppe mei wat libben is,
fan ’t djippe tsjuster nei heech sinneskyn.
* Foto ‘Coelacant’
mei 7, 2023
fan ûnbekend*
fan ûnbekend*
De jonge Werner hold fan fjoerwurk,
hat dat yn syn miny-auto set
om dêr op strjitte mei te boartsjen,
flammen skeaten út ’e wein,
dat wie ’t begjin fan syn raket.
Folwoeksen Werner liet him liede
troch ambysje, hat him net ferset
tsjin Hitler, mar mocht foar him wurkje,
wat it doel wie, waard him sein:
ûntwerp rap in V-2 raket.
Fersleine Werner mei syn kennis
fan raketten hat him fierder ret
troch foar Amearika te wurkjen;
wat er die, rûn as in trein:
foar ’t universum in raket.
De âlde Werner liet him liede
troch it leauwe yn Gods majesteit:
’t hielal sprekt fan syn grutte wurken,
dêrmei wie it heechste sein…
mar ek wat yn ’t ferline leit?
* Foto ‘Werner von Braun tusken de Nazi’s’
** Foto ‘Werner von Braun tusken de Amerikanen’
