juni 3, 2018
fan Emile Zola*
Wat kin de pinne al net dwaan
troch flamjend foar it rjocht te skriuwen,
dat ta stof fertrape wurdt;
de skriuwer kin de oanstjit jaan
om mei ’t beskuldigjende wurd
de haters te ferdriuwen.
It wurd kaam fan Emile Zola,
de jonge dy’t yn earmoed libbe,
ûnderfûn wat ûnrjocht wie;
hy moast it fan syn pinne ha,
syn skriuwen fierde ta de die,
hy hat it net oerlibbe.
Hy skreau foar Dreyfus, offisier
beskuldige fan spionaazje,
wylst er wol betrouber wie;
Zola hold Dreyfus’ wurd foar wier,
want wêrom wie in Joad syn die
net rjochte op ’e naasje?
‘J’ accusse’ joech de ear werom
oan Dreyfus, gjin diskriminaasje,
mar sa tocht net elkenien;
hoewol’t Zola fertsjinne rom,
waard him troch ien de dea oandien,
foar Frankryk in blamaazje.
* Emile Zola (1840-1902)
Iepen brief ‘J’ accuse’
mei 27, 2018
fan ûnbekend*
Wa ken net de hjitte hûn?
De hotdog, broadsje mei in woarst,
hat op ’e wrâld syn paad wol fûn,
waard yn Amearika in moast.
Moatst ris priuwe, fette hap
út Dútslân, iuwen al bekend,
de hûn in hapke foar de grap,
it bistke rekke deroan wend.
De Dútsers namen ’t hûntsje mei
de weagen oer, as ymmigrant,
it fûn dêr daliks al syn draai,
de fette fretter waard syn klant.
Dorgan** tekene ta spot
in teckel tusken ’t broadsje knypt,
besegele wie doe syn lot,
dêrnei hat elke fretter grypt.
Chestnut*** friet yn ien minút
sân teckels op, in nij rekord,
der kaam dêrnei ek wol wat út,
dy brune brokken eagen goar.
* Spotprint ‘Hotdog’
** Tad Dorgan syn spotprint út 1906
*** Joey Chestnut iet yn 2013
yn tsien minuten 69 hotdogs op