juli 2, 2017
fan Luke Fildes*
fan ûnbekend**
De kroan moast moannen wachtsje
foar’t dy op ’e holle kaam:
de blineterm woe net omlyk,
dus waard er Edward rap ûntnaam***
foar ’t keningskip oer ’t Britske ryk.
As jonkje hiet er Bertie,
’t learen wie him wat te dreech,
it libben sels hie hy op ’t each,
as playboy hold er froulju heech,
om’t hy dat spul net blyn ynseach.
Syn frou waard Alexandra,
foar him keazen, bleau him trou
yn dagen fan syn lok, har kwea,
mar beide sonken wei yn rou
om berntsjes troffen troch de dea.
Lykweardich wiene minsken
wie ’t prinsipe dat er hie,
de frede lei him nei oan ’t hert,
Europa joech er goede rie,
mar harmony, dat slagge net.
* Luke Fildes (1843-1927)
Skilderij ‘Portret fan kening Edward VII’
** Foto ‘Kening Edward VII en keninginne Alexandra’
*** Yn juny 1902 waard Edward operearre
juni 25, 2017
fan ûnbekend*
Op it eilân Martinique
lei it havenplak Saint Pierre
mei tritichtûzen minsken,
gjin stêd wie oan dat plak gelyk,
want Mont Pelée hold trou de wacht…
wat hiene sy dan noch te winskjen?
Himelfeart, dat wie de dei
dat de katedraal fol siet;
it wie op slach fan achten
doe’t bûten gie it der omwei,
want Mont Pelée joech klappend acht,
gjin minske hie dy slach ferwachte.
Wolken riisden himelheech,
gloeiend fan fertarrend fjoer
dat rûn oer plein, troch strjitten
en lei de tsjerkegongers leech
mei boppe har de lavafracht…
wa koe noch fan de himel witte?
Twa, teminsten yn Saint Pierre,
ien siet yn de deadesel,
beskerme troch de muorren;
yn ’t sirkus waard er letter stjer,
it libben sels joech dêr ferslach,
it hat it alderlangste duorre.
* Foto ‘Gloedwolk fan Mont Pelée’