september 23, 2018
fan ûnbekend*
fan ûnbekend**
Hy liet him jilde as profeet
mei boeken dy’t de iuw beskreaune
fan alderheislikst fûle striid,
sa kaam de wrâld de takomst oan de weet,
gjin wapens dy’t ferburgen bleaune.
It witten siet al yn it brein
as jonkje, want hy woe ferkenne
fan eigen nei de nije tiid,
sa waard de basis foar de takomst lein,
de wrâld moast oan syn wapens wenne.
De oarloch fan de wrâlden waard
ferklearre troch de Martianen,
tentakel-wêzentsjes fan Mars,
se strielen ’t Britske leger fan de kaart
oant ierdske wêzentsjes*** opkamen.
Doe kaam de oarloch yn de loft
mei fleanmasines om te sjitten
op wat op ’t grûnflak stikken moast;
atoomfoarsizzings duorren noch in skoft,
mar Wells syn brein hat dêrfan witten.
* Foto ‘Herbert George Wells’
** Boekomslach ‘Oarloch yn de loft’
*** Baktearjes en mikroben
september 16, 2018
fan ûnbekend*
fan ûnbekend**
In beuker wol de wrâld ferkenne:
kening, keizer, admiraal,
it jout neat wat er wêze wol,
it is no ienkear syn ferhaal,
hy moat himsels dêryn werkenne.
Puyi, hy wie doe noch mar trije,
kaam yn Sina op ’e troan
en waard net wat er wêze woe,
mei seis jier seach er it him oan,
de revolúsje liet him swije.
Wer keizer waard Puyi mei alve,
sa woe ha in generaal,
mar tolve dagen letter hie
syn fijân in hiel oar ferhaal:
in jonge tusken ridels wolven.
Japanners, dy’t syn lân besetten,
setten Puyi op ’e troan,
lykwols allinnich foar de show,
dêrnei wie it foargoed bedoarn,
de foarst waard troch de Rus opsletten.
Puyi koe hiel de wrâld ferkenne:
beuker, keizer, boargerman,
it joech neat wat er wêze woe,
de oar betocht foar him it plan,
dêr moast it mantsje mar oan wenne.
* Foto ‘Puyi as beuker’
** Foto ‘Puyi as boarger’