december 15, 2019
fan ûnbekend*
fan ûnbekend**
Dokter, dûmny, kolonel
waard roppen as de grutte Tsjoender
fan de fanatike Ku Klux Klan;
de ridders fan it fjoer en bloed
beskôgen ’t krús as wûnder.
Tsjoenders himel wie de hel
foar oaren: Joaden, katoliken,
yn syn eagen wiene dy ferlern;
de ridders fan it fjoer en bloed
beskôgen har as liken.
Simmons klom mei man en macht
de Stienberch op om op te rjochtsjen
’t krús en tagelyk de Ku Klux Klan;
de Tsjoender fan it fjoer en bloed
woe sa de wrâld ferljochtsje.
No noch waret troch de nacht
de ynfloed fan de grutte Tsjoender
op ’e falske presidinteclan;
de heechste ridder bringt yn noed,
slacht ligend op foar wûnder.
* Foto ‘William Joseph Simmons’
** Foto ‘Ku Klux Klan yn Atlanta’
december 8, 2019
fan ûnbekend*
fan ûnbekend**
In himelwolk is goed foar rein,
ferkuollet nei in hjitte dei,
in ierdewolk knypt strôten ticht,
sa komt men oan in kweade ein.
Gjin gas as wapen yn de striid,
mar libben se dy ôfspraak nei?
Fritz Haber seach it as syn plicht
it út te finen, want de tiid…
… rûn troch, de fijân moast derút,
mei gauwens út ’e fuorgen wei,
mei gloar ferlear er alle sicht,
wat achterbleau, wie deade bút.
By Ieper waaiden wolken oan,
earst op ’e Frânsen ta, doe nei
de Kanadezen, gjin gewicht
hie ’t gas… hoefolle binne stoarn?
Swier wie it tellen, om ’e nocht,
want fuorgesifers rûnen troch
elkoar en dogge dat no noch…
wa’t achterbleau, hat noch lang socht.
* Foto ‘Gifgasoanfal’
** Foto ‘Gifgasoanfal op ’e Kanadezen’