oktober 4, 2020
fan Erich Mendelsohn*
‘Organysk,’ wie it kommentaar
fan Einstein by de iepening,
‘ik sjoch de foarmen floeien.’
De wittenskipper wie optein,
it keunstwurk rekke mannich snaar.
De tiid is oan de romte bûn,
sa wol de relativiteit,
de teory fan Einstein;
der is relaasje ûnderling,
lykas de dei lûkt nei de jûn.
Gjin teory is samar wier,
de toer moast soargje foar ’t bewiis
troch stúdzje fan de sinne;
it gie úteinlik om it feit,
gjin tiid en romte foar ’t fertier.
Wol binne keunst en wittenskip
ferbûn mei Einsteins rûne toer;
sa’t foarmen floeiend rinne,
is foar it each de werklikheid,
mar wittenskip hâldt wol de grip.
* Erich Mendelsohn (1887-1953),
arsjitekt fan de Einsteintoer
september 27, 2020
fan ûnbekend*
Ire, grime om ’t ferline,
ûnderdrukking troch de steat
dy’t oer weagen hearskje woe
yn alle dielen fan de wrâld,
it Britske ljocht soe oeral skine.
Ierlân ien? It moast yn dielen:
’t suden waard in republyk,
it noarden bleau by Ingelân,
’t wie katolyk tsjin protestant,
it Ierske eilân mei twa sielen.
Grime lôge troch de jierren
yn it noarden, katolyk
woe hearre by de republyk,
in lûde flok foar protestant,
it Britske ljocht kaam swak fan fierren.
* Kaart ‘Ierlân’