Willem Tjerkstra’s thússide

Archive for the Mytebylden category

admin

Andromache

Mytebylden

fan Jacques-Louis  David*

Andromache, frou fan Hektor,
Trojes aldergrutste held,
in frou dy’t folle net genôch ferlear,
sy hat de deaden op har fingers teld
en wie mei njoggen noch net klear.

Heit, har man en noch sân bruorren
waarden troch Achilles slein,
it bloed rûn yn Skamandros, in rivier;
de frou fan Hektor wie har rie te’nein,
de ein kaam noch, it wie safier…

… dat se sjen moast dat har soantsje
fan de muorre smiten waard,
wylst Troje gûlde om dy bernemoard;
de Griken hiene oars net as spotsk praat
doe’t Andromache kaam oan board…

… fan Achilles’ soan, dy’t Pyrrhos
hiet, foar har in anty-held,
dy’t op har ynstiek mei syn spot en spear;
foar Pyrrhos hat him ek in moardner meld…
foar Andromache kaam de kear.

* Jacques-Louis David (1748-1825)
Skilderij ‘Andromache treurt om Hektor’

admin

Amphitryon en Alkmene

Mytebylden

fan ûnbekend*

Se wiene foar elkoar bestimd:
Amphitryon en syn Alkmene,
mar net earder as de saak
folbrocht wie om har broers te wreken,
it hearde by syn trouwe taak.

Elk wit fan Zeus: hy jout en nimt,
hy naam foar eigen nocht Alkmene
as wie hy Amphitryon,
sa naam hy beide wreed geweken,
it rûn foar ’t houlik op ’e non.

Teiresias, yn ’t lân bekend
as fiere sjenner, brocht fersoening,
mar de berte weage swier,
in twaling waard fan tiid it teken:
de iene let, de oare ier.

Dat Herakles wie net bestimd
foar kening troch fertrage berte,
nettsjinsteande soan fan Zeus…
wa koe him op dy godheid wreke,
gjin mins komt op ’e wrâld as reus.

* Yllustraasje ‘Amphitryon en Alkmene’

Archieven

Zoeken

  • Categorie

  • Datum