Archive for the Lyrysk Deiboek category

It paad rint troch it libben,
faak der ek bylâns,
rjochts groeit it grien fan hoop
en links stekt djip it blau,
wa’t lykwols trochrint mist de kâns
en is foar ’t libben op ‘e loop.

Se libje dêr tegearre
by de simmer lâns,
de beamstam en de plom,
it wiffe bûcht al gau,
it grouwe bliuwt lang yn balâns,
mar groeit mei djippe groeden krom.

It wie mei ’t heechste fan de sinne
op in moaie simmerdei
doe’t ik se rikken seach.

Se stiene tusken kadestiennen
by de brêge oer de grêft
te sjen mei mannich each.

It stribjen wie no ienkear winne,
hegerop by ljochtskyndei,
wat fleach waard sjoen as pleach.

Doe kaam in skûtsje troch de brêge,
’t makke oan de kade fêst
en ‘k seach it daliks al.

De stâlen rjochten rap de rêgen
wylst de eagen skeaten fjoer
en ’t kroanblêd krôle bol.

It waard wer ien fan harren pleagen,
’t fleugelfleanen op ‘e mêst,
no rikt elk foar de lol.