juli 17, 2023
It is grif gjin ambysje
sprutend út it minske-aard
om hegerop te kommen,
om te winnen fan de konkurrint,
it goud blinkt boppe ’t sulver út…
mar sy sit hjir op yntuysje.
Noch foar ’t de griene snilen
komme boppe ’t wetter út,
hat sy op yntuysje
deade reiden oanfierd foar har nêst,
ambysje is gjin sprake fan,
nei ’t eigen aard hat sy it spile.
Foar har sil goud net blinke,
aaien lizze oan har hert
om letter út te kommen,
yntuysje soarget foar de groei
en slút de konkurrinsje út,
lit wol har skerpe striidrop klinke.
juli 10, 2023
Sjocht de boer it net mear sitten,
sil er stikke yn it stof,
dat waait de griene greiden oer
dêr’t gjin blom is te bekennen,
dan sjocht er him net mear as boer.
’t Spul giet oer yn oare hannen,
elke hân krijt dan in part,
de grinzen wurde fier ferlein,
sá dat parten skieden wurde,
de grûn wurdt wei troch kraan en wein.
Sjocht de boer werom op earder,
tagelyk nei hjoed de dei,
dan slacht it hert sân slaggen oer,
stof genôch om yn te stikken,
hy is gefoelich as eks-boer.