Archive for the Keunst category

De skilder lei de putter fêst
kleureigen op paniel,
de wjukken yn de rêst,
in punt as sinnestriel.

’t Paniel kaam yn in muorrekast,
as doar foldie it bêst,
sa’t alles naadleas past,
de putter dûbelfêst.

Se fongen him mei taaie lym
op ’t prikje by syn nêst,
syn jubelliet op rym,
dat hearden se foar ’t lêst.

It keunstke mei de fingerhoed,
sa put er flink syn foer,
mar fêst en dat foargoed,
dêr kin er mar min oer.

Hy sjocht syn freon, ek bûnt fan kleur,
dy klapte tsjin it rút,
mar ’t mieske fljocht mei fleur
de kant fan frijheid út.

* Carel Fabritius (1622-1654) hat in skoft
by Rembrandt wurke, wat fan ynfloed wie
op syn wize fan skilderjen.
Hy hat ‘It putterke’ yn it jier fan syn dea skildere.
Op 12 oktober 1654 kaam er by de ûntploffing
fan in krûdmagazyn yn Delft om it libben.

Dat de krêft fan hout it groeie lit,
sil ’t iepen each rjocht reitsje,
dat de kromme stam fan nearne wit,
dêr sil de keunstner wat fan meitsje.

Krêftich gutst er streken yn ’t gelid
en flekken as in grienmank,
dat gefoel gjin stam of blêden mjit,
harmoniearret as in mearklank.

Harkje hoe’t de wyn it rûzje lit
troch krunen en strewellen,
komposysje dy’t fan nearne wit,
sil alles yn majeur fertelle.

Mar lit klinke hjoed de dei de hit
mei kleuren yn de sinne
dy’t it hout natuerlik groeie lit,
dat keunstners ek noch gutse kinne.

* Jan Lievens (1607-1674) arbeide yn
Amsterdam as freon mei Rembrandt op,
foar’t er yn 1634 nei Antwerpen ferfoer.
Yn dy stêd makke er in tal houtfiken,
dêr’t er tige bedreaun yn wie.