Archive for the Keunst category

Tegearre hawwe se oerlein,
de skilders fan ’t barokke paradys,
elk koe him dêryn fine:
Bruegel is troch ’t hôf fan Eden tein
en Rubens makke minsken eigenwiis.

It tilde op fan dieren doe’t
flewielen skilder sa syn rûntsje rûn,
noch sûnder kwea en pine,
alle bisten joegen libben lûd,
fibraasje út ‘e loft oant op ‘e grûn.

’t Yntime wie der efkes ôf
doe’t Rubens stjitte op ’t ultime stuit
fan troch de slang ferbline
minsken mei’t de man naam fan de frou
de frucht dy’t mei de eigen wiisheid struit.

Doe gie de glâns fan it flewiel,
de beide hûnen blaften nei de ein,
de ko koe wol ferdwine,
want de rôvers brieken mei ’t gehiel
en dêrmei wie it hôf út lykwicht slein.

* Jan Bruegel (1568-1625)
waard om syn kleurgebrûk
de flewielen Bruegel neamd.
* Peter Paul Rubens (1577-1640)
krige as earetitel prins ûnder
de skilders.

Hoe soene famkes skake kinne,
logysk tinke nei in strategy,
sy fiele mear foar harmony
as om it keningsspul te winnen.

Mar harren heit wie fel ferlichte
yn in tiid fan frou op ’t fêste plak,
sa krigen famkes har gerak
as keninginnen op ‘e hichte.

Ien fan syn dochters, Sofonisba,
wie de keninginne fan it doek,
har byld wie as in iepen boek:
myn suskes skake en dat is sa.

De trend is kleurich troch har setten,
nettsjinsteande ’t neaken bleau taboe,
it feminisme joech se doe
in kâns yn famkesskaakportretten.

* Sofonisba Anguissola (sirka 1535-1625)
krige har oplieding by twa Italiaanske
master-skilders. Sy groeide út ta
in ynternasjonaal bekende skilderesse.