Archive for the Keunst category

Lit Brussel it mar showe
ienheid mei in grut ferskaat,
lit wapperje de findels
foar religy, ek foar Jan Soldaat
en slaan de grutte trommen,
want de optocht is op paad.

Lit Isabella sjitte
op ‘e deade pappegaai,
dy’t út ‘e fearren rekket,
mar by Albrecht krijt er net dy swaai,
sa wurdt sy keninginne,
dy’t beneamt him as lakei.

Lit alle lieders sjitte
op ‘e bûnte pappegaai,
Europa sil it witte
dat mar ien it heechste wurde mei,
sa sille oaren litte
elk in fear, mar net syn aai.

Lit Brussel it mar showe
ienheid mei in grut ferskaat,
lit unifoarm de dowen
omgean, mar dan elk wol nei syn aard,
lit sa Europa skowe
alle grinzen fan de kaart.

* A. Sallaert (sirka 1590-1657/1658)
wie in Brusselske skilder,
dy’t fan de optocht yn 1615
in skilderij makke hat.
Aartshartoch Albrecht en syn frou
Isabella wiene ek op it feest.
Isabella rekke de pappegaai
by in sjitwedstriid en mocht har
dêrom keninginne neame.

De wei wie lang, de ein fan wei,
rûn foar ’t gefoel fier oer de kym,
in streekje yn ’t ûneinich platte lân,
prozaysk mei de beammen wol op rym,
it wie yn ’t lêste fan de dei.

De dei rûn skier oer yn de jûn
mei ’t sinnegiel noch oan de kym,
in brede streek as lôge op in brân,
mar mear nei foaren wie it wat gegriem
fan modder op ‘e kâlde grûn.

Sy is in streekje fertikaal
en libbet tusken wyt en swart,
rint mei har beide geiten oan de hân
foarby de bocht, dêr’t sy it nachtstee hat
en dreamt har eigen sljocht ferhaal.

* Willem Maris (1844-1910)
krige syn oplieding by syn broers
Jacob en Matthijs.
Sy wiene skilders fan de Haachske
skoalle: in realistyske werjefte
fan lânskippen mei ympressionistyske
oansetten.