Archive for the Keunst category

Syn hannen klamme om de koer
mei fruchten fan de geefste soart,
sa is no ienkear Mario,
in jonge dy’t fan alles doart,
want Adams apel is foar him net soer.

De skilder liet syn skouder bleat,
lei erotyk op it gesicht,
de styl fan Caravaggio,
dy’t tilde oan ’t morele licht,
hy hat him ta de jongesleafde keard.

Doe waard foar Caravaggio
it read de kleur fan bloed troch moard
nêst leafde foar syn jonge freon;
hy fûn by him in feilich oard,
in geve kuorfol fruit fan Mario.

* Caravaggio (1571-1610) wie in skilder
dy’t earst yn earmoede libbe. Nei’t er
in moard begien hie, moast er flechtsje.
Hy waard troch Mario Minniti opheind.
Fan him hied er earder it skilderij
‘Jonge mei fruitkoer’ makke.

It skip mei Rome as bestimming
slacht brutsen tsjin de rotsen oan,
mar ’t is noch lang net moarn,
benearjend is de stimming.

It rêden folk is bot ferklomme
en hinget op de wiete brot,
yn ’t neaken is it lot
fan dy’t út gaos komme.

Helpfeardich slepe de Maltezen
foar fjoer en mage brânstof oan,
want ’t is noch lang net moarn
foar ’t folk folslein ferwezen.

Ien hat lykwols gjin lege holle,
jout moed en tûken foar it fjoer,
mar ’t lijen is net oer,
it glydt nei fierste folle.

In njirre kronkelet út ‘e tûken
en falt de pols fan Paulus oan,
it is noch lang net moarn,
de dea kin him wol brûke.

Hy skoddet wol, mar net fan ’t lijen:
de njirre krijt in fjurrich lot,
gjin slang of mins is god,
sjedêr de moarn, in nije.

* Adam Elsheimer (sirka 1578-1610)
waard berne yn Frankfurt.
Hoewol’t er faak depressyf wie,
stie er bekend as de skilder
fan it ljocht.