Archive for the Keunst category

Hy wie in krimineel fan rûch geweld
tsjin boarger, swalker en sipier
en sloech har mei de fûsten del;
yn eigen eagen wied er held
mei hurde kop en oeral spier,
fan him koe ’t minskdom nei de hel.

Mar op in dei seach hy de galge stean,
it duorre amper ien kertier,
doe hong er oan it strakke tou;
it spierspul, slop fan kop oant tean,
wie foar de kennis libbenswier,
dus kaam er fan de galge ôf.

Dêr lei er stjonkend ûnder oarmans each,
wylst dokter Tulp syn spier lossnie
dy’t spand west hie om wyld te slaan;
as held yn byld, net mear in pleach,
joech hy de dokters lichemsrie
om har pasjinten goed te dwaan.

* Rembrandt (1609-1669)
wie op 31 jannewaris 1632
by de anatomyles fan dokter Tulp,
dy’t de earmspier fan Aris Kindt,
in ta de galge feroardiele misdiediger,
lossnie.

Hy libbe op in achterstân
en swalke faak op strjitte,
dêr’t er ek syn maten fûn,
gjinien oan sibben bûn,
noch minder oan ferstân
fan hegerop yn ’t witten.

Hy wist wol wêr’t er wêze moast,
by Frank mei syn fioele,
beide âld, mar fol muzyk,
soms dûnsjend op ‘e dyk,
in libben as in foarst,
oant beide, dronken, foelen.

Hy hie it fan syn maat al leard
en wist de stôk te striken,
sa dat elk wol harkje moast
en hy ’t noch better doarst:
gjin noat wie mear ferkeard,
syn hichte die doe bliken.

* Frans Hals (1582-1666)
ferkearde yn it begjin fan syn karriêre
faak ûnder folk fan leech alloai.
Yn de perioade fan 1620-1630,
syn hichtepunt as skilder,
makke er it panieltsje
‘Jonge mei fioele’.