Archive for the Keunst category

As skilder wie hy faak op jacht
nei proaien yn it wide fjild;
hy joech op de nuânses acht,
mar foar de bút kriich hy gjin jild.

Hy moast it ha fan eigen geast,
it lôgjen fan it hillich fjoer,
Hubertus’ pylken noch it meast,
syn eagen skeaten ’t lânskip oer.

Yn de fierte seach er jagers gean
mei hûnen hoartend oan de riem,
yn ’t foar al fûler as in earn,
op seinejacht op ’t hillich hiem.

Hy brocht noch gjin nuânses oan
by ’t hege wurd fan mis en bea,
dat klonk as troch in jagershoarn:
‘Hear, jou jo seine oer de dea!’

Doe briek it hillich moatten út,
it klonk oer ’t fjild mei knal en flok,
it bistelibben waard gjin bút,
de skilder hie’t dy deis ek drok.

* Hippolyte Boulenger (1837-1874),
fan earmoedich komôf,
skildere nei de natuer lânskippen
yn de geast fan de skoalle fan Barbizon.
Skilderij ‘De Sint-Hubertusmis’

Hy boude gjin fortifikaasje,
hie fan oarloch noch gjin weet,
mar troch it wapenfjoer gie ’t need:
de muorren brieken, wissichheid
ferlear fan frjemde naasjes.

Doe boude hy in plak foar bisten
dy’t hy sa beskermje woe
tsjin fijân waar en wyn, mar hoe
koe hy it himelfjoer ferslaan
dat pleats en bist net miste.

De tiid fret fierder oan de muorren,
wylst de minske libbet noch,
want syn bestean giet tiidbûn troch,
kin wissichheid noch wille jaan,
de jeugd hat mar koart duorre.

* Emanuel Murant (1622-sirka 1700)
waard berne yn Amsterdam en stoar yn Ljouwert.
Hy is bekend wurden as skilder fan doarpsgesichten.