Archive for the Bibelbylden category

Lit my sjonge fan de helden,
sieraad fan hiel Israel,
net langer blinkend, samar del,
it wie de fijân dy’t doe telde.

Rop it net yn fijâns strjitten,
dat de dochters fan dat slach
yn jubel reitsje oer ’t gesach
dêr’t inkeld bergen noch fan witte.

Bergen fan Gilboa, jimme
krije rein noch dauwe mear,
want skyld en spear ferlearen ear
en drager, dus bedim jim stimmen.

Heit en soan, altyd tegearre
yn de striid foar Israel,
sy joegen har net earder del
as yn it lêst, by harren stjerren.

Lit de dochters út ús rûnte
gûle om wa’t fallen is,
sy wiene fan it pronkgoud wis
en wisten dat sy poarper wûnen.

Jonatan, do leave jonge,
wiest foar my mear as in broer,
no is de ierdske leafde oer,
lit my foar dy as held noch sjonge.

* Keunstwurk ‘David spilet op ‘e harpe’

It moast wol barre yn de striid
troch ’t Filistynske foarhûdfolk,
oars as yn earder tiid
doe’t David tsjinne as Gods tolk.

detail

De striid wie fûl en gie ferlern,
wylst Saul bedarre yn in rein
fan pylken, sa te sjen
rûn ’t nei de ein lykas foarsein.

De ein, mar net troch ’t foarhûdfolk,
syn wapendrager moast it dwaan
as Samuël syn tolk…
soe eigen folk de kening slaan?

Saul seach ’t him oan, syn geast wie dea,
no noch syn liif yn ’t eigen swurd;
’t berjocht rûn troch it gea:
gjin soan fan Saul dy’t kening wurdt.

detail

It foarhûdfolk fûn kenings lyk
en hat troch hals en nekke slein,
mei David gjin ferlyk,
want hy hie Goliat ferslein.

* Pieter Breugel de Oude (sirka 1520-1569)
Skilderij ‘De selsmoard fan Saul’