Archive for the Bibelbylden category

It gie fûleinich deromwei,
it wie de Filistyn dy’t wûn,
it folk seach tryst werom op dizze dei:
de stien hie gjin oerwinning jûn.

Mar as de stien gjin help mear biedt,
dan moat de arke it wol dwaan:
de Iene op ‘e troan, it nijste liet,
jou oan de prysters rap rom baan.

It gie fûleinich derwomwei,
de Filistyn hie dûbel moed,
de troan bleau leech, de Iene seach dernei
en swei: de stien siet ûnder ’t bloed.

De lege troan foel op ‘e grûn,
it wie de Filistyn dy’t griep
en naam him mei, tsjin wat it folk ferbûn
mei Him: de hoeder fan syn skiep.

* Gerrit Bleker (sirka 1600-1656)
Skilderij ‘Slach by Eben- Haëzer’

** Eben-Haëzer

Dat Samuël lei op ‘e knibbels,
wat fan Ely moast… en fan de Hear,
hy wiisde him it Wurd as boarne,
as streamend wetter koel en klear,
mar sei neat tsjin syn smoarge soannen.

Hy hearde op in nacht ien roppen,
miende dat it bline Ely wie,
mar nei de tredde kear: ‘De Iene,
dus jonge, folgje no myn rie,
do silst Him straks dyn earen liene.’

De fjirde kear kriich hy te hearren
wat de Iene oer de pryster sei:
it oardiel oer de heit syn swijen,
it wie de ein fan Ely’s wei,
mei Samuël kaam der in nije.

* Joshua Reynolds (1723-1792)
Skilderij ‘It jonkje Samuël’

** Skilderij ‘Samuël wurdt roppen’