Archive for the Bibelbylden category

De kening harke nei ’t ferhaal
en seach it foar him, hiel konkreet:
de earme mei in wif bestean
waard troch de rike brocht yn noed en need,
dus kriich dy by syn fleet de dea as lean.

De fraach wie noch: wa hat dat dien?
Doe wiisde Natans finger nei
de kening, ’t waard sa hiel konkreet,
dat David hat it skerpe wurd ferstien,
hy seach Batsjêba foar him… sûnder kleed.

* Jacob Backer (1608/09-1651)
Skilderij ‘David wurdt troch Natan teplak setten’

De kening liet him witte,
hy fertsjinne lizzend rêst:
nei ’t striden nei de frou;
Uria hold oan ’t slachfjild fêst,
woe sels net nêst Batsjêba sitte.

Uria moast wer komme
by de kening foar in brief
oan Joab, generaal
op ’t slachfjild, dus gjin noed om ’t liif,
syn eachweid waard opnij ferromme.

De generaal liet witte
dat Uria moast foaroan
him yn de striid bejaan;
it kaam fûl oan, doe is er stoarn,
hat nea fan kenings moardplan witten.

* Jacob Backer (1608/09-1651)
Skilderij ‘Uria kriget fan David de brief foar Joab’