Archive for the Bibelbylden category

Allinnich Samuël wist fan
’t begjin fan dat mystearje:
‘Isaï, lit my jo soannen sjen
oan ’t offermiel, wol neffens plan,
ik sjoch it is in hiele searje.

Sân soannen kamen doe foarby,
dy’t allegearre strielden
by de earste bêste eachopslach,
der wie lykwols gjin earste by,
dy’t achter each en ear ek fielde.

Hy wie noch by de skiep yn ’t fjild
en moast ynienen komme
nei ’t mystearje tusken God en him,
waard boppe syn sân broers úttild,
de oalje hat syn geast ferromme.

* Franz Anton Maulbertsch (1724-1796)
Skilderij ‘De salving fan David’

Hoe is it safier kommen
dat Agag op ‘e knibbels leit,
de kening fan folk Amalek?
’t Komt dat Samuël de wierheid seit:
hy is foargoed ferdomme.

Folk Amalek hie deade
fan Israel de mem en ’t bern
op reis nei it beloofde lân;
Samuël joech troch: ”t Is no ferlern,
slaan dea al dat ferkearde!’

Kening Saul sloech ta, mar sparre
de kening en it fette fee
en rjochte foar him op in stien:
‘Hjir, sjoch by my op, ik bin no ree
en kin op ’t fette tarre!’

Samuël moast doe wol komme
mei foar twa keningen in flok:
Saul rekke kroan en mantel kwyt,
Agag woe noch ha: ‘Dit is myn lok!’
mar doe… syn lûd ferstomme.

* Gustave Doré (1833-1883)
Yllustraasje ‘Samuël deadet Agag’