Archive for the Bibelbylden category

Se kamen foar de kening-rjochter,
de iene yn de earm de dea,
de oar it libben, sy wie klear,
beseach de kwestje nochter.

De mem mei ’t kâlde bern koe wize
op ’t ruiljen yn de neare nacht,
sy sliepte, sloech op ’t bern gjin acht,
it libben wie betize.

De mem mei ’t waarme bern ûntkende
by heech en leech, sy wie gjin hoer
dy’t ruile bern, soks wie har oer,
sy hie gjin deade berne.

Doe kaam oan ’t wurd de kening-rjochter:
‘It swurd dielt wat noch libben is,
elk is dan foar de helte wis.’
’t Ferfolch komt daliks, tocht er.

De mem fan libben koe wol grize,
de oare mem keas foar de dea,
doe wie it foar de kening klear,
hy die it op syn wize.

* Nicolas Poussin (1594-1665)
Skilderij ‘It oardiel fan Salomo’

Kin in dream ta wierhied wurde
of driuwt er as de wolken oer?
In flits, in tongerslach,
ferskynsels sûnder foarm en doer,
mar dochs, soms klinke wiere wurden.

De dream fan kening Salomo:
It wie de Iene dy’t him sei
te freegjen wat er hawwe woe,
hy soe it fan de Iene krije.
Salomo tocht net lang nei,
hy wie as kening jong, hoe koe
hy him oan ’t rjochte libben wije?
Opmerksumens, dy iene wei
fan rjocht, it goede boppe kwea,
sa kaam de kening mar op trije.
It wie de Iene dy’t doe sei
dat Salomo om wiisheid bea,
mar folle mear noch soe hy krije.

Kin in dream ta wierheid wurde?
De wiisheid naam de rykdom mei
en ’t libben lang fan doer,
mar nei de nacht kaam earst de dei
fan ’t keningsmiel mei sljochte wurden.

* Pedro Berruguete (sirka 1450-1504)
Skilderij ‘Salomo’