Archive for the Bibelbylden category

Mei har twaen gie it nei it wiet
lykas it folk teach nei de Reade See;
Elia en Eliza kamen del
yn de Jordaan, foar beide ree
om troch te gean, it âlde liet.

Ien kear wie der noch in koart petear:
‘Wat kin ik by de skieding oan dy jaan?’
‘Skink my in dûbel erfdiel fan jo geast.’
Dat diel wie dreech om oer te dwaan,
it kaam by ’t lêste sicht wol klear.

Himelfjoer is sûnder fêst getal,
Eliza seach de hynders en in wein,
hie yn de stoarm syn master foar de geast;
Elia’s mantel koe gjin ein
en hong wer om ’t profetestal.

* Giovanni Piazetta (1683-1754)
Skilderij ‘De ûntfiering fan Elia’

Gjin deade kening noch, ferwûne
seach hy it libben oan,
in ôfgod soe wol útkomst jaan,
by Gods profeet hie hy ’t bedoarn.

Elia harke nei de Iene,
mar net nei: ‘Kom no oer!’
As godsman wie syn antwurd koart:
‘De himel sprekt hjoed noch mei fjoer.’

Twa pelotons ha it net rêden,
it tredde rûn de wei
fan djip respekt foar de profeet,
sadat de Iene sei: ‘Gean mei!’

Elia kaam by kenings siikbêd
mei: ‘Jo regear is koart,
in ôfgod hat gjin libbenskleed,
jo eigen deadskleed eaget swart.’

* Otto van Moerdrecht (stoarn yn 1438)
Tekening ‘Achazja op it siikbêd’