Archive for the Bibelbylden category

Al syn bruorren wiene wei,
de dea ynjage troch in binde,
foar Achazja waard it ljochtskyndei
as kening, sûnder dat it wende.

Omke Joaram wie de foarst
fan Israel, hy woe mei ’t leger
tsjin Hazael stride, dat doe moast
Achazja mei… wie hy ynteger?

Arams kening wûn de striid
en Joaram rekke swier ferwûne,
lei ferslein op bêd, wie út ‘e tiid,
Achazja winske him doe sûnens.

Dizze winsk kaam net mear út:
gjin foarst regearde yn de naasje,
want de dea kaam dûbel ta beslút,
se wiene beide út ‘e graasje.

* Neffens Promptuarii Iconum Insigniorum
Tekening ‘Achazja, kening fan Juda’  

Joaram, foarst fan Juda,
kening yn Jeruzalem,
de stêd fan foarfaar David,
hat net harke nei syn stim,
liet leaver ôfgodsbylden ta.

Moardner fan syn bruorren,
ek guon fan de hegerein,
soks yn de stêd fan David,
’t lêste wurd wie noch net sein
oer ’t lijen fan syn eigen bern.

Strider tsjin de fijân,
Edomyt en Arabier
en Filistyn as David
fochten hie al mannich jier
ferlyn, mar Joaram hold net stân.

Heit fan sleine soannen,
fuortfierd nei it frjemde lân,
fier fan de stêd fan David,
noch hie Joaram it net hân,
hy moast syn eigen termen sjen.

Joaram, foarst fan Juda,
lijer oan de geast en lea,
noch jong by kening David,
hy waard iepen foar de dea,
sa woe it ôfgodslibben ha.

* Neffens Promptuarii Iconum Insigniorum
Segel ‘Joaram, kening fan Juda’