juli 8, 2024
fan ûnbekend*
Daniël
Nei de dream sels kaam de útlis,
dêr’t de kening mei in glimk nei harke,
want hy wie de gouden holle,
God hie him dat heechste foarrjocht jûn.
Dêrnei kaam in ryk fan sulver,
minder glânzjend as dat fan de kening,
dat fan koper glom noch folle
minder, hearske wol oer hiel de wrâld.
Nei it koper folge ’t ryk fan
izer, dat de hiele wrâld oan splinters
sloech… wa soe dan libje wolle?
Ek dat fjirde ryk rûn nei de ein.
Hurd sil ’t fiifde ryk ek wêze,
mar de klaai fan pottebakkers makket
izer swakker, de útholle
macht hâldt op it lêst grif ek net stân.
Nei fiif keninkriken komt it
keninkryk fan God, de stien dy’t alle
oare riken – izer, gouden
holle, koper, sulver, klaai – ferslacht.
Yllustraasje ‘It byld en de keninkriken’
juli 7, 2024
fan ûnbekend*
Daniël
Daniël gie wer nei Arioch,
dy’t him hastich nei de kening brocht
foar útlis oer de ûnbekende dream
om sa te sparjen alle wizen
dy’t de dream net brochten oan it ljocht.
Doe joech Daniël de foarst beskie
dat net hy, mar God it riedsel wist.
Hy makke ek de útlis iepenbier
om op wat komme soe te wizen:
‘Wit, o kening, dat gjinien dit mist:
Grut wie ’t byld dat jo foar eagen kaam:
goud de holle, sulver ’t liif, dêrnei
kaam koper, izer ûnder, mar sjedêr:
de fuotten wiene ek fan izer,
lykwols mongen mei de weake tichelklaai.
Sûnder hannen skuorde los in stien,
dy’t it hiele byld oan diggels sloech,
o kening, sa is ’t yn jo dream krekt gien.’
* Yllustraasje ‘It byld’