mei 17, 2017
fan ûnbekend*
Petrus wie earst op ien ein,
want Jezus hie it oer in beam
mei minne fruchten, dat loek hy him oan:
‘Filippus,’ sei er, ‘sa hat er it sein,
it is foar my bedoarn!’
Petrus harket faak mar heal,
dus holp ik him gau út ’e dream:
‘In beam mei goede fruchten is der ek,
want soks stiet boppe wetter as in peal!’
Dat byld fûn hy net gek.
Noch woe Petrus derop ta
dat Jezus sei, hy harke net
en dat de die net nei syn wurden wie:
‘Ik woe graach Jezus justjes wizer ha,
dat is myn wize rie!’
Wer gie ik tsjin Petrus yn:
‘Hasto dyn geastlik hûs net set
op rotsgrûn, lykas Jezus dat graach sjocht?’
‘Jawis wol, gjin gefaar mei rein en wyn!’
Dat Petrus’ ein waard rjocht.
* Foto ‘Hûs op ’e rots’
mei 13, 2017
fan Domenico Fetti*
Freon Tomas kaam jûn efkes oan,
myn freon, jawis, ik ha no alve maten
en Jezus is ús master,
ik bin der wis fan… ek Gods Soan,
wat my yn ’t earst net oan woe,
no woe Tomas mei my prate
oer de fijân om ek fan te hâlden,
wat er net begripe koe,
en ek net om him altyd stil te hâlden
as syn fijân moarn foar master opslaan soe,
hy fûn dat Jezus maklik prate
koe, want wie in oardiel sa ferkeard?
En dan it foarbyld oer de blinen,
wie dat net in iepen doar…
gjin bline wiist de oar it paad,
want soks giet op ’e kop ferkeard,
hast yn de kop dêr net twa eagen foar?
Dan noch de balke yn dyn eigen each,
freon Tomas koe dêr net oer út,
want soed er by himsels in splinter fine
mei dy balke yn ien each?
Dat Tomas fûn dat byld mar neat.
Watsei… wat myn reaksje wie?
Dat Jezus sa mei ús as maten prate
woe… yn bylden, dus mei wat foar eagen,
sûnder balke of in splinter, want sa hie
freon Tomas wat om oer te praten.
* Domenico Fetti (sirka 1589-1623)
Skilderij ‘De balke en de splinter’