Archive for the Bibelbylden category

Petrus as Kristus-sizzer

fan ûnbekend*

Folslein bin ik no yn betizing
om wa’t ik einliks bin,
in Kristus-sizzer of de satan?
De iene goed, de oare min…
is dat syn ûnderwizing?

De fraach fan Jezus fûn ’k al nuver:
‘Wat seit it folk oer my?’
Ik koe der earst gjin fet op krije,
soks giet folslein oan my foarby…
is sa’n petear wol suver?

Doe kaam de fraach: ‘Wat sizze jimme?’
Dêr wie ik gau mei klear:
‘Ik sis dat jo de Kristus binne!’
Fan my kriich Jezus alle ear,
mar klonken der mear stimmen?

De stim fan Jezus klonk allinnich,
dat hy slim lije moast,
úteinlik soe hy dêroan stjerre,
mar dêrfan leaude ik gjin barst
en sei, it wie ûnsinnich.

Ik moast myn sizzen slim belije,
waard mei syn wurden slein:
‘Gean daliks foar my wei, do satan!’
Dat waard my as dissipel sein…
moat ik no Jezus mije?

Ofbylding ‘Petrus’

Skipssjoernaal fan Andréas

fan ûnbekend*

De weagen binne ús bekend
by ’t skynsel fan de moanne,
dy’t de mar opljochtsje lit,
in fisker is net gau benaud,
omdat er fan it tsjuster wit.

Wy binne nachts dus wol wat wend,
fannacht lykwols wie ’t spannend,
sterker noch, der wie panyk,
wy sieten mei ússels oanklaud
en wiene witer as in lyk.

Hysels hie ús de mar opstjoerd
nei ’t fisk- en bôlewûnder,
hie ferlet fan in gebed;
wy foeren yn de twirren op,
wat noaske stjoerman Petrus net.

Ynienen wie der grutte noed:
in skynsel, hiel bysûnder,
sweefde midden oer de mar
op ús oan, sûnder tuskenstop,
dat elkenien wie yn de war.

Gjinien hie dat ferskysel troch,
net earder as doe’t Jezus
stapte by ús yn it skip
en ha woe dat it wie fertroud,
doe kaam by ’t roer wei: ‘Wol ferhip!’

* Skilderij ‘Jezus rint oer de weagen’