Archive for the Bibelbylden category

Mem út Tyrus

fan ûnbekend*

In mem giet foar har bern troch ’t fjoer,
by wize dan fan sprekken,
ik ha alles foar myn dochter oer,
yn wa’t de duvel it te sizzen hie,
se stie bekend as gekke.

Ik bin wol net fan joadsk komôf,
mar wist, in Joad wie kommen
dy’t wat die foar minsken yn it nau,
dus gie ik nei him ta foar rie en die,
dat ik waard sjoen as stomme.

De Joad spriek earst ek yn in byld:
‘Lit bern de bôle krije,
want dy wurdt net mei de hûntsjes dield.’
It iene byld rôp doe it oare op,
mar koe myn sprekken lije?

Ik ha it dochs nei foaren brocht:
‘In hûntsje krijt de krommels.’
Syn reaksje wie net om ’e nocht:
de duvel fuort, myn dochter libbe op…
de mem as in gek frommes?

* Foto ‘Tyrus op ’e rots’

Earst heit begrave

fan ûnbekend*

Myn fielen gie twa kanten út:
nei heit, krekt stoarn, fannacht
ha ik noch by him wekke,
en nei de man út Nazaret,
hy ferge my op in beslút.

Hy prate earst oer foksehoal
en fûgelnêst as plak
om ûnderdak te wêzen;
dêr hat er ien teplak mei set,
dy man seach him as in idoal.

Hy kearde him doe nei my ta
en sei planút: ‘Gean mei!’
Dus daliks mar opbrekke
as wie syn wurd de heechste wet
en soe ik neat mei thús mear ha.

Myn fielen wie earst by ús heit,
dy’t ik begrave moast,
de deadebea ek lêze;
ik hie ’t by him lykwols net ret,
de hiele saak hat hy omdraaid.

* Foto ‘Rotsgrêf’