februari 26, 2020
fan ûnbekend*
Twa geasten kin men ûnderskiede,
de Geast fan God sprekt jimme oan
mei Kristus as Gods Soan,
de wrâldgeast hat ús neat te sizzen,
sit heech op ’e ierdske troan.
De Geast fan God sil jimme liede
nei Kristus, man fan fleis en bloed,
dy’t jout de minske moed
om him foar ’t libben ta te rissen
tsjin it kwea, de ierdske floed.
De wrâld sil jim profeten biede
dy’t profetearje tsjin de Hear
en prate kear op kear
oer wrâldske wierheid, ’t kin net misse,
’t giet har om de eigen ear.
* Glês-yn-lead yn de Voltivekirche yn Wenen
februari 22, 2020
fan Frans Floris*
De leafde komt fan God
en elk dy’t leafhat, is syn bern
dat mei de Heit ferbûn is,
lykas Kristus as syn Soan,
sa giet de leafde nea ferlern.
Ha yn jim libben leaf
as broers dy’t foar elkoar bestean,
om’t jim de leafde jûn is
troch de Hear, oan ’t krús ferstoarn,
Hy hat ús sels syn libben bean.
Fan Kaïn ha wy neat,
om’t hy in bern wie fan it kwea;
de moard op syn broer Abel
sleat net by de leafde oan,
mar rûn mei haat op nei de dea.
Dat leafde wint fan haat
komt troch de leafde fan de Hear:
sjaloom yn plak fan Babel.
* Frans Floris (1516-1570)
Skilderij ‘Kaïn en Abel’
