september 9, 2018
fan ûnbekend*
Foarst Ferdinand waard klear gewaar
’t ferfal fan ’t Ottomaanske ryk
en rôp foar Bulgarije frijheid út,
himsels ta dekorearre tsaar…
de Rus beskôge him as bút.
Hy wie net Russysk-Ortodoks,
gie earder troch foar katolyk,
dus waard soan Boris yn dat leauwe doopt;
syn heit wie slûchslim as in foks…
de Rus hie dêrom noch wol hoop.
De doop fan Boris hie gjin doel
en moast yn heit syn fisy oer,
want Russysk-Ortodoks joech mear gewin,
ferhâldings wiene net mear koel…
de Rus joech Ferdinand syn sin.
In oarloch yn de hiele wrâld
rûn foar de tsaar net sinfol ôf,
hy waard ferslein lykas it Dútske ryk,
ferhâldings wiene winterkâld…
it lân waard doe in republyk.
* Foto ‘Ferdinand I’
september 8, 2018
fan Rafaël*
De opdracht weage swier foar ús,
wy hawwe twa útdroegen,
Ananias en Safira,
man en frou, sy kamen nea wer thús.
Sy hiene juster grûn ferkocht
en woene jild oerdrage,
alles wat se krigen hiene,
sa’t se beide seine, om ’e nocht…
… want Petrus hie de leagen troch,
de Geast waard sa bedragen,
net allinnich de gemeente,
sa’t er sei, ik hear syn oardiel noch.
Ik stie derby dy earste kear
doe’t Ananias weiwaard,
elkenien wie út ’e liken,
want dêr lei er, hie gjin siken mear.
De twadde kear seach ik noch krekt
it fallen fan Safira;
swier wie ’t om har út te dragen,
it is dan krekt as der wat brekt.
* Rafaël (1484-1520)
Skilderij ‘De dea fan Ananias’