februari 12, 2017
fan ûnbekend*
fan Otto Eerelman**
Fuort mei de monargy
en gjin gorilla op ’e troan,
sa woene ha de sosjalisten,
kening-aap hie it bedoarn,
hy hearde thús by wylde bisten.
Behâld de monargy
foar ’t folk, ús dochter op ’e troan,
liet Emma, regentes, doe witte,
sy fertsjinnet grif de kroan,
sil Nederlân wer bloeie litte.
De striel fan de fontein
spat oer de koets rojaal it ljocht
foar Wilhelmina, keninginne
fan mar achttjin, mar mei rjocht,
emansipaasje fan foarhinne.
Gjin oare frou te sjen,
de manlju slaan foar master op,
wêr bliuwe no de sosjalisten?
Apen hawwe heech it krop
op hynders dy’t dit lang al wisten.
* Brosjuere ‘Ut it libben fan Kening Gorilla’
** Otto Eerelman (1839-1926)
Skilderij ‘Yntocht fan keninginne Wilhelmina
op 5 septimber 1898’
februari 11, 2017
fan Stephen Gjertson*
Wêrom liet de Iene my soks sjen?
Op ierde wie ’k in kreaze faam,
de twadde frou fan Jakob,
mem fan Joazef en fan Benjamin,
syn berte ha ik net oerlibbe,
sadwaande dat ik by de Iene kaam,
in ivich libben nei myn sin,
mar wol belutsen by myn sibben.
Dêrom seach ik Joazef yn it lân
fan farao, as slaaf, ’t die sear
dat broers myn soan ferkochten,
mar it gie wol goed mei Benjamin,
hy hat as jongste elk oerlibbe;
de Iene brocht foar Joazef ek in kear,
hy soarge foar in goed ferrin,
hat nei in earlik lykwicht stribbe.
Wêrom moast ik op ierde sjen
krekt yn de tiid fan ’t berne Bern,
de omkear troch de Iene…
as ferstoarne mem fan Benjamin?
Hoefolle ha it ner oerlibbe…
’k ha bitter gûld om al myn deade bern,
Herodes praat de moard net skjin
op al myn leave lytse sibben.
* Stephen Gjertson (1949-…)
Skilderij ‘Rachel gûlt om har bern’