It rikke boppe Snits fan spanning,
want De Lemmer kaam deroan
op ’t skûtsje mei in winnend sin;
de fraach wie: komt er op ‘e troan,
de jonge Jelle* tusken syn bemanning?

De reek waard nei de start noch tichter,
want De Lemmer kaam deroan
oer stjoerboard, dat it like min;
de fraach wie: wa komt op ‘e troan?
De jonge Jelle waard in kilo lichter.

De reek soe letter rap ferwaaie,
want De Lemmer kaam deroan,
frij silend sa’t in winner kin;
de fragen rekken út ‘e toan:
de jonge Jelle koe jûchheiend swaaie.

It rikke op De Lemmer minsken,
want de krânse kaam deroan
op ’t skûtsje mei in winnend sin;
it roer feroare yn in troan…
wat hie de jonge Jelle noch te winskjen?

* Jelle Reyenga

Se seagen moarns al yn it waar
mei wolken dy’t by ’t swurk lânsjagen,
wiene net benaud foar wyn of baar,
mar hiene wol beskate fragen.

Ferhâldt it túch him mei de mêst
of moatte wy twa reven stekke,
litte wy de wanten like fêst
of steane triedden dan op brekken?

It hong deryn, al by de start
en ek by Teakesyl syn pylder,
Siete* krige rom en rûch syn part
foaroan, gjin skipper sylde wylder.

Dochs rûn er op in seare klap
troch ’t bloedread fan in flagge, fjochtsje
woed er foar de ear, it wie gjin grap,
faaks soe de fiere kym noch ljochtsje.

It klapte om de boei deryn,
de gyp en dan der skerp omhinne;
Lemsters joegen om gjin baar of wyn,
se klapten, want se soene winne.

* Siete Meeter