It komt der faak op oan by roer en skoat,
de rêch tsjin ’t hout, de hân ta fûst,
mar op de Fluezen hâldt de wyn him koest,
dochs binne alle spieren spand oan board.

De brune fan De Jouwer lûkt it net,
lit achter mar in sunich spoar,
hoewol’t se hâlde, keare, mar dat ’s foar,
de boom en loete binne heger set.

By Boalsert achterop is ’t jongfolk baas,
want Eldert* hat in hernia
en kin de rêch net tsjin it helmhout ha,
de soannen wurde tredde… topgeraas!

* Eldert Meeter, heit fan Siete (roer)
en Pieter (skoat)

Wâldsein, it plak fan wurdt it wat,
want op ‘e mar stie amper wyn
en boppedat hie ’t oarloch west:
de liuw hie mei De Lemmer mot,
dat Jelle* lijde oan de pest
en Rienk** seach ’t donker yn.

Mar sjoch, de wedstriid hie wol wat,
want foar lei ’t skûtsje fan Wâldsein,
dêrachter wrachtich wier de liuw
en Jelle dan, de pest ta spot,
hy tocht: As ik mar driuwen bliuw,
dan helje wy de ein.

Hy hie gelyk, mar ’t wie wol wat,
want Rienk naam op De Lemmer wraak
en sûnder dat it oarloch waard,
foar ’t liuwke wie it earste skot,
it dreau De Lemmer fan de kaart,
foldie sa oan syn taak.

* Jelle Reyenga
** Rienk Zwaga