As de wyn de reiden bûge lit,
dan sprekt it rûzjen fan de fearkrêft
om oerein te bliuwen, mar is dit
de muoite wurdich yn it ljocht fan
rjochte rêgen mei in blanke pit?

Hâldt metaal de rêch net better rjocht?
It stribbet boppedat nei hichte
oant safier, want funksje skriuwt de bocht
syn plak en bûging foar; dy lichte
kin net helje by natuerlik ljocht.

… fan ’t oergean troch it tsjuster nei
de moarn mei noch keunstmjittich ljocht
heech boppe ’t streekjen fan de dei,
in teken fan it hegedruk-
gebiet fan hûndert yn de bocht
en wol in tritich yn in ruk…

… sjedêr, se steane klear yn ’t giel
dat oergiet yn it ljochte grien
fan de natuer as in gehiel,
in stribjen fan it sûne folk
nei harmony en sa wurdt ien
en al de dei en ik bin tolk.