Dit is wat Snitser Douwe* fûn:
op De Lemmer hie it moatten,
winner wurde mei it doel
op eigen wetter kampioen.

Dit is wat Jouster Anne ** bûn:
poermin starte mei it swarte
perspektyf fan misse boel,
de konkurrint waard kampioen.

De twadde priis dy’t Ljouwert wûn,
wie as Ulbe*** dêrmei boarte,
Turbo hold syn holle koel
en kriich it waarm as kampioen.

* Douwe Visser
** Anne Tjerkstra
*** Ulbe Zwaga

It is de wedstriid fan de sigaret:
wêr giet de reek no hinne,
want de skipper wit it net,
de wyn wurdt fretten troch de sinne.

De Jouwer, nûmer ien yn ’t klassemint,
kin sûnder wyn net rinne,
dus jout reek korrekt de hint
foar ‘Oeral thús’: dêr moatsto hinne.

De reekplom driuwt it skûtsje nei de top,
de kâns om hjoed te winnen,
mar de Pan komt kop oan kop,
mei boom en loete wurdt it stinnen.

De lêste boei, no noch it lytse rak,
de liuw driuwt rap derhinne,
wylst de Pan leit lang foar blak,
de reek lit ‘Oeral thús’ net winne.