In Huitema, as wie ’t in boer,
de namme seit net alles,
mar sa kaam it wol by skippers oer.

Syn mem har namme, Foekema,
fertelde fan in Lucas,
elke skipper wist: dy sylde sa!

Wie Huitema mar Foekema,
sa gûnze it fan praatsjes:
‘Ja, dan woene wy dy Frans wol ha.’

Frans Huitema hie belle, want
hy woe wol skipper wurde:
‘Ja, ik bin in man nei silerstrant.’

It wie foar Drachten gjin probleem:
op ’t skip in boerenamme,
dat foar Frans kaam út in jongesdream.

By Earnewâld wie syn debút:
twa steigers waarden spuonnen
en De Jouwer kriich in hurde tút.

Wie Huitema mar Foekema,
dy namme is fan izer,
want dêr moat in skipper it fan ha.

* De nije skipper fan Drachten

Pake, beppe… tankewol,
jim ha jim skeamel miel fertsjinne
op in skûtsje ûnder seil,
ik spylje no de skippersrol
en sil foar jimme winne.

Hellingbaas is noch myn fak,
dat mannich skûtsje ha ik lutsen
op it droege foar in beurt,
fan warings oer de boech nei ’t flak,
mar amper reven stutsen.

‘Oeral thús’, sa fielt it krekt,
it grutste makket my beskieden,
want it kin net oeral troch,
ik wit ek dat it djipper stekt,
mar wa ken net syn dieden?

Skûtsjematen… tankewol,
ik bin no freon fan de kommisje:
alles nij, ek fok en seil,
jim binne foar de skipper gol,
ik sil ’t foar jimme risse.

* De nije skipper fan De Jouwer