Hy hie it minder treffe kind
as learling fan de grutte master
Rembrandt, wiid en siid bekend,
beseach er ’t fallen fan it ljocht
dat trochkrong yn it tsjuster,
mar dochs, hy wist it noch net rjocht.

‘Myn freon, ’t alles vanitas
sa’t Preker it de Joaden learde,
dêrom lit it libben los
dat fûl tsjin fijâns findel focht,
sjoch ien kear noch nei juster,
set vanitas yn ’t skrille ljocht.’

De Poorter liet syn kinnen sjen
yn harnas, oarlochsbút en findel,
de matearje giet ferlern,
sjedêr de man dy’t rúzje socht,
leit as skelet yn ’t tsjuster
en brutsen falt it wiffe ljocht.

‘Myn freon, ’t gehiel is net sa min,
betink lykwols wat ik dy learde:
’t libben hat in djippe sin,
want sjoch it bern yn ’t folle ljocht,
wylst hoeders, ’t paad earst bjuster,
ha him har sljochte earbied brocht.’

* Willem de Poorter (1608-nei 1648)
krige syn oplieding yn it atelier
fan Rembrandt yn Leiden.
Hy makke, lykas syn master,
in tal skilderijen mei bibelske tema’s.

Hat hy dy stellen om dyn glim,
de man foar eigen folk en naasje?
Rome wie him neier as Parys,
mar dochs, hy wachte op dyn stim,
mei ’t glimkjen folop graasje.

Dyn mûle hast net iependien
doe’t hy dyn sêfte hûd betaaste,
seachst allinnich skruten, suver fiis,
hoe’t hannen, geil fan fleis oer bien,
om dyn erkenning raasden.

Dyn eigen hannen leine stil,
gjin heil foar eigen folk en naasje,
want dyn glimkjen eage inkeld wiis,
de hiele wrâld oer wie dyn wil
yn frijheid en mei staasje.

* Leonardo da Vinci (1452-1519)
waard berne yn in Toskaansk stedsje
by Vinci.
Hy krige syn oplieding yn Florence
by byldhouwer Andrea del Verrocchio.
Mona Lisa, ek bekend as Lisa Gherardini,
wie 25 jier doe’t se skildere waard.
Yn 1911 waard it skilderij troch
in Italiaanske nasjonalist stellen
út it Louvre te Parys. Twa jier
letter wie it wer teplak.