Arkeferskaat

admin

oktober 19, 2016

Arkeferskaat

Omdat er nei syn opdrachtjouwer harke,
kapte hy en seage ’t hout
ta planken, wetterticht de hichte yn;
it wie út need, want Noach siet net fout
en sa ûntstie de arke.

It wetter waard ta freon en oare arken
bleauwen lizzen foar de rêst;
dêrachter riisden wenten fan de grûn
op fûneminten djip en muorrefêst,
mar wol tichtby in marke.

Omdat er wenje woe en ek noch farre,
net út need mar foar ’t plezier,
betocht er ’t wettertichte arkehûs
en mei it sicht op nasjonale sier
befoer er Fryslâns marren.