september 9, 2022
fan ûnbekend*
Hattusa, stêd út it ferline,
trijetûzen jier al lyn,
doe’t de Hettiten sterker wiene
as de folken yn ’t gebiet
fan bergen, delgeand nei de see,
dy stêd sil nea folslein ferdwine.
Hattusa mei syn sterke muorren,
mei syn poarten, fiif yn tal,
dy’t inkeld foar de tagong tsjinnen
fan it eigen folk dat gie
derút as hearskers oer it gea,
sy ha harsels as liuwen fuorre…
… mei proaien om sa sterk te bliuwen;
út ’e poarte stiek de kop,
it byld om frjemden op te kearen,
dat gjin fijân kaam deryn…
Hattusa, stêd fan hjoed de dei,
noch altyd grânzje dêr de liuwen.
* Foto ‘Liuwepoarte’
september 2, 2022
fan ûnbekend*
Yn grotten is it meastal tsjuster,
rekket men de rjochting kwyt
en driget yn de nederklits
te kommen, gjin ûntkommen
oan de werklikheid.
De glimwjirms jouwe de yllúzje
fan in himel, folop ljocht
fan stjerren, hjir en dêr in flits,
in grot om yn te kommen
foar ’t ynsekt dat nocht…
… hat oan in loft mei tichtby stjerren
dy’t him nûgje foar de dûns,
net wittend fan de werklikheid
fan glimwjirms dy’t heech klommen,
dêr’t er krijt de bûns.
* Foto ‘Waitomo Glimwjirm Grotten yn Nij-Seelân’