juli 28, 2023
fan ûnbekend*
Lykas de berch fielst dy ferlern
yn de fallei fan Ordesa:
wat is in minske tusken hichten?
Noch lytser as in krûpend bern.
De berch ferlear syn wite top
dy’t stadich nei de lichte glied
om as kâld wetter del te kommen,
hy kaam der nea wer boppe-op.
Wat ûnder bliuwt, is de fallei,
oantinken oan it skowend iis,
dat út ’e berch de stikken hapte,
dat selskip is foargoed foarby.
As selskip hasto noch de berch,
dy’t folle âlder is as dy,
as krûpend bern sjochst nei syn hichte:
de goede reus en do as dwerch.
* Foto ‘Ordesafallei yn de Pyreneeën’
juli 21, 2023
fan ûnbekend*
Bylden út in fier ferline
rize út ’e grûn wei op
yn ’t keale gea fan Arizona,
dêr’t gjinien te finen is,
wol spilet wittenskip foar wis.
Bylden kinne ’t lot fertelle
fan it oerwâld dat dêr wie,
de beammen waarden tsjok bedobbe
troch de jiske fan it fjoer
dat lôge ’t hiele lânskip oer.
Hout feroare yn kristallen,
dat in stam waard sa in byld
dat útstiek boppe ’t flakke lânskip,
sa ûntstie in iepenloft-
museum foar in duorjend skoft.
* Foto ‘Jasper Forest yn Arizona’