januari 8, 2023
fan ûnbekend*
Hoewol’t er net nei swarten skaaide,
gie er troch it libben as Black Bart,
dy’t foar ’t gefoel as út ’e nacht
opdûkte, wylst mei syn revolver swaaide.
Gjin masker hie hy foar de eagen,
dy’t er sjitte liet, as wie ’t al bard,
se brochten ’t folk rap yn syn macht,
gjinien dy’t noch de oanfal op him weage.
Hy waard op ’t lêst dochs arrestearre,
troch in kneppel waard syn eachweid swart,
sels sloech er op syn tastân acht,
hat wa’t syn hannen bûn komplimintearre.
De fraach wie wat him motivearre
of beweegde om te dwaan as Bart
dy’t swarde by in swiere fracht
oan rôversguod, dus waard er operearre.
Syn harsens waarden sa fersetten
dat se pasten yn ‘t korrekte part
fan dy fan ’t folk dat altyd acht
slacht op in diktatuer mei strange wetten.
* Foto’s ‘Reimund Holzhey’
januari 2, 2023
fan ûnbekend*
fan ûnbekend**
Wat is leafde oars as hâlde fan
de man dy’t ek fan dy hâldt;
al is hy foarst fan Ingelân
en bist sels twa kear skieden,
de leafde bringt de bân ta stân.
Boppe alles giet de leafde út,
de foarst koe it net hâlde
by it keningskip fan Ingelân…
wa soe him dan ferbiede
te rikken nei har tredde hân?
Ek al wie de tsjerke resolút:
de âlde noarm behâlde
fan de skieding út gjin nije bân,
de foarst liet him net liede
troch wetten yn syn heitelân.
Wat wie leafde oars foar him
as fan syn Wallis hâlde,
ek al kost it him syn Ingelân,
himsels koe hy har biede,
dêr hat sy folle mear oan hân.
Foto ‘Wallis Simpson’
Foto ‘Edward VIII en Wallis Simpson’
