september 4, 2022
fan ûnbekend*
fan ûnbekend**
Sy hie in heit as arsjitekt,
dy’t wrâldferneamd waard troch it Bauhaus,
en in mem, fan manlju gek,
dy’t har dochter seach as poppe,
mar dat wie ’t him krekt.
Sy wie krekt fiif, doe woe mem al
foar har in rol yn it teater,
want neat wie foar har te gek;
’t moaiste famke fan hiel Wenen
joech har mem de rol…
… fan frou yn ’t sintrum fan de wrâld,
dy’t manlju om har fingers wuolle,
nei de iene grut ferlet
fan in oare sûnder triennen,
want dy smakken sâlt.
Manon waard by har mem besmet
mei in bestean yn folle gloarje,
dêrby kaam noch polio;
rôljend troch it wiffe libben
hat sy ’t net lang ret.
Mei achttjin jier hat sy ferlern
de lêste siken, as in ingel
waard sy yn de keunst betocht:
yn har geast klonk de fioele,
ivich bliuwt sy bern.
* Foto ‘Manon Gropius en har âlders’
** Foto ‘Grêfstien fan Manon Gropius’
augustus 28, 2022
fan ûnbekend*
Twa binne oan it smoken,
mar de tredde hat de hannen gear,
sjocht streekrjocht foar him út,
hy spilet poker, giet foar mear.
Lit Roosevelt of Churchill
ta dat moardners krije harren sin?
Nee, Churchill slút soks út
en Roosevelt fynt moardzjen min.
Mar sjoch nei Stalins hannen
dy’t gjin earbied ha foar minskebloed,
tsien fingers wiene út
yn Oekraïne op in floed…
… dy’t weage oer de fjilden,
krong djip yn de grûn, de minskesiel
koe net oer ’t lijen út,
te witen oan in fint fan stiel.
Noch wurdt der poker spile
op itselde eilân, sjoch de Krim
dêr’t Poetin liet him út,
al like wreed as wie er him.
* Foto ‘Konferinsje fan Jalta yn 1945’