juli 2, 2023
fan ûnbekend*
fan ûnbekend**
De Russen en de Finnen
rekken yn in fûle striid,
reus Goliat en David,
middenyn de wintertiid.
Wol fjouwer kear safolle
Russen stjitten op ferset
fan Finnen mei rindieren,
fan ek skys wie grut ferlet.
Twahûndert kear safolle
tanks, wat koene dy tsjin skys?
Skys woene better glide,
mar de kimen eagen griis…
… fan oermacht fan de Russen,
fleanmasines kamen oer,
wol achtentrichtichhûndert,
hûnderttritich dêr foaroer.
De Finnen hisen flaggen
as symboal fan harren moed
as David, Goliat wûn,
mar ferlear it measte bloed.
* Foto ‘Striid op skys en mei rindieren’
** Foto ‘Flagge as symboal fan moed’
juni 25, 2023
fan ûnbekend*
Koloradokever…
de namme klinkt as yn in liet,
de kleuren blinke as in skilderij,
it bistke docht him foar
as tsjinner fan ús Leave Hear,
mar jou him net dy ear.
Hy wenne yn Amearika,
friet dêr it fjild mei jirpelplanten keal
en emigrearre nei
Europa, dêr’t syn miel al klear
wie, mar net ta syn ear.
Syn miel, bestruid mei DDT,
wie oars as earder yn Amearika,
it smakke nei de dea,
de jirpels smakken doe nei mear,
dochs kaam der wer in kear.
Want DDT krong oeral yn,
it gif kaam ek yn ’t miel fan dier en mins,
wie skealik foar ’t miljeu,
it tsjinne net ús Leave Hear,
men wie der doe mei klear.
De koloradokever kriich
de ear fan foarbyld fan de dea troch gif,
dus brûkt men dat net mear.
* Foto ‘Koloradokever’