oktober 27, 2024
fan George Orwell*
As bisten op in buorkerij
de boer it near oplizze,
dan ûntstiet in nije lear
en krije sy it foar it sizzen.
De bargen gnoarje grutspraak út
en wurde hear en master,
binne mei it minskdom klear
en spylje slim foar kritikaster.
It hynder lûkt in swiere fracht
lykas de ezel drage
moat de lêst fan hear de baarch,
dy’t soarget foar syn eigen mage.
Sy binne ’t proletariaat
en hawwe neat te sizzen
yn de barge-diktatuer,
de hearen dy’t de wet oplizze.
De nije ideology
kaam nei de revolúsje
fan tal bargen yn de drek
fan egoïstyske yllúzje.
Tirannen raze har nep-nijs
om sa de wrâld te winnen
foar har eigen lege lear,
har macht sil stadichoan ferrinne.
* George Orwell (1903-1950)
Yllustraasje ‘Animal Farm’
oktober 20, 2024
fan Margaret Bourka-White*
fan ûnbekend**
Foar har wie earst gjin plak te heech
om del te sjen mei noch in each
dat fêstlei wat dêrûnder barde,
hichtefrees liet sy net ta,
sy wie net bang, mar doarde.
Mei konsintraasje skeat sy byld
nei byld yn ’t kamp fan Buchenwald,
sadat gjin misdied waard fergetten,
want gjin minske woe ’t sa ha,
sy hat de foarstap setten.
De minske yn in bleat bestean,
tsjinholden troch it stikeltrie,
koe amper fan it leed fertelle
fan ’t appel, dat plak rûn skean…
wa koe de deaden telle?
Mar sy fertelde mei har byld
de leechte fan it skeane stean,
moast dêr de hichte foar ferlitte,
leger koe gjin libben gean,
de wrâld moast dêrfan witte.
* Foto ‘Margaret Bourke-White (1906-1971)
fotografearret út ’e hichte wei’
** Foto ‘Finzenen yn Buchenwald’
