Archive for the Skiednisbylden category

It útstel kaam fan it regear:
it spoar moast komme fan de steat,
dan soe de naasje skiednis skriuwe,
mar ’t parlemint fûn dat mar neat,
ús lân moast op it âlde driuwe.

Gjin steatsspoar, dan partikulier:
guon ûndernimmers brochten jild
yn ’t laad, der soe in spoarbaan komme
fan Amsterdam troch ’t iepen fjild
nei Haarlem, de krityk ferstomme.

Sjedêr, de trije byinoar:
de skûte, dilisjâns en trein;
it fjoer moat fan it meunster komme,
dat wint fan ’t skip en ek de wein,
mar elke reizger is ferklomme.

* Yllustraasje ‘De earste treinreis yn Nederlân (1839)’

Sân jier lang hold Nederlân it leger
yn beweging, mar der kaam krityk,
want jild wie net allyk it slyk,
de kosten waarden hieltyd heger.

Willem liet de Konferinsje witte
dat er him wol dellei by ’t ferdrach,
dus Leopold kriich it gesach
oer België, de ein fan ’t sjitten.

Lytse lantsjes op ‘e grutte ierde
tusken naasjes mei mear sizzenskip,
foar har wie it ferdrach de tip
yn frede it bestean te lieden.

* Yllustraasje ‘Fredesferdrach fan 1839’