Archive for the Skiednisbylden category

Trettjin jier, noch mar in puber,
kaam syn dream út, as matroas
keas hy foar de marine;
mei de see- en krûdlucht yn de noas
koe hy syn draai wol fine.

Jacob seach by Philippine
hoe’t de Belgen foeren nei
de sloep mei trije kleuren;
kûgelsrap naam hy de flagge mei,
in held mei dissipline.

Elkenien kaam it te witten
dat de held wie in matroas,
sa’n die wie dik yn oarder;
Jacob hie foar ear in skerpe noas,
hy kriich de Willems-Oarder.

* Yllustraasje ‘Jacob Hobein rêdt de flagge’

** Jan Willem Pieneman (1779-1853)
Skilderij ‘Jacob Hobein’

De Belch, yn opstân tsjin de foarst,
moast mei ’t kanon wer yn de bân
fan ’t keninkryk, dat joech gjin barst…
lang libje striidber Nederlân!

Van Speyk soe sjitte mei ’t kanon,
mar stjoerleas rekke nûmer twa,
syn strategy rûn op ‘e non…
hoe moast de kommandant dit ha?

Dêr stiet er as de admiraal
dy’t foar de naasje striidber wie,
as jonge koed er dat ferhaal
fan elke kear in heldedie.

‘Klim jimme rap nei boppen ta
en fiel noch ien kear hoe’t de wyn
dêr waait, de Belch sil ’t skip net ha,
de loft gean ik dan leaver yn!’

De linkerhân de hichte yn,
ien knibbel op ‘e houten flier,
it krûd joech fjoer en hurde wyn,
Van Speyk fleach mei, ’t is stjerrend wier.

* J. Schoemaker-Doyer (1792-1867)
Skilderij ‘Van Speyk foar’t er it krûd oanstekt’
Skilderij ‘Van Speyk stekt it krûd oan’