mei 10, 2020
fan ûnbekend*
Natuer, privee en polityk,
de fraach is: kin it alle trije
of makket men de bêste kar?
It libben is oan kânsen ryk,
men kin der net genôch fan krije.
Paul Langevin gie foar natuer
en frou en bern, it waarden fjouwer,
syn twadde kar kaam net oan bar;
mei syn natuer wie hy sekuer,
oan Albert Einstein wie er trouwer…
… as oan syn frou en fjouwer bern,
Marie Curie koe sprekken lije,
mei syn natuer hold hy fan har;
de wittenskip gie net ferlern,
dêr koed er net genôch fan krije.
’t Lûd fan nazisme stie him tsjin,
syn sonar heinde de gefaren
op, sa bedarre hy yn ’t far
fan ’t kommunisme, want: ‘Ik bin
ûntkommen oan de heechste baren.’
* Foto ‘Paul Langevin’
mei 5, 2020
fan ûnbekend*
fan Paul Mondriaan**
Sjoch nei de gaos fan de kriich
en freegje nei in heger sin
as wat de wapens biede kinne
oan mei bloed trochdrinze grûn…
der is in wrâld te winnen.
Te sjen is no in nije tiid
as antwurd oan de maatskippij,
dy hat wat oars as kriich fertsjinne,
fan reële regels frij…
der is in wrâld te winnen.
Mei eagen op in oare styl
kin wiere keunst de trochslach jaan,
de slach troch oare stilen hinne,
net oan wat men sjocht mear bûn…
der is in wrâld te winnen.
Sjoch nei de styl dy’t oarder biedt,
de harmony fan streek en kleur
yn plak fan gaos om dy hinne,
’t giet fan ’t strakke swart nei fleur…
der wie in wrâld te winnen.
* Skilderij ‘Gaos’
** Paul Mondriaan (1872-1944)
Skilderij ‘Komposysje…’
